by Omar Ahmed Mohammed Mostafa
Published on: Jan 12, 2005
Topic:
Type: Poetry
https://www.tigweb.org/express/panorama/article.html?ContentID=5026
جواب (1) ولإنه لسّة الروح هايمة ما بين جنبين ولإنه معني الوطن مسقطشي بالجملة ولإني حاسس إني مبعدتش كتير عني ولأنه ولإني.. ولعدة الأسباب رفضت رد الباب وسبته مـــتوارب يمكن نسيم مبروك يفهم كلام مني جواب (2) في هجرة الألوان وهجرة الأرواح للبرزخ الأول السحر ما يفوتشي من تحت عقب الباب والزيف بيتشعلق مرهون بغربتـنـا لوِّن حيطان بيتنا بصورة للأحباب امشي ف مسيرة دعم للمولد الثاني إتبرع ولو بــّيا إحــفـظ أغانيّـا وارميني ف المالح قلـِّب ف ألبومي وانساني لو يرضيك وسّع عيون الشبك وفتـّح الشبابــــيك حيي علم روحـنا وردد الأناشــــيد كلبش ف أقرب ايد ومتحترفش الغياب ولو نويت السفر لوِّن حيطان بيتنا بصورة للأحباب جواب (3) ليه كل ماجي ارسمك ألاقيـــني بارسمني هو انتي إيـه فـيّـــا ولا انتي إيـه منـِّي هو احنا إيه بالظبط أصلي نســيت النحو ونسيت أصول الضبط وانـتي نسـيتي الكلام يـــــــــــاااه.. يا مـــــــوفق الألوان يا صاحــــــب القدرة فين أول الخضــــرة وفين حـــــدود البحر جواب (4) سامحيني لو حسيت أكتر من المسموح حاكم ساعات الصفا معادتش مفتوحة الشفرة راحت فين الشفرة مطروحة للاكتتاب العام في خطة لاستئصال الاكـتــئاب العام والعام يعدي العام وانا وانتي بــّرانا مع إن في الجرنان صورتنا ملطوعة واللـّمـــة ممنوعة في كل مـياديـنـّـا والكلفة مرفوعة بين صبرنا وبينـّا سنة ساتـّة ملغية وبقيت سنينا كلام ما أزعج الكوابيس لما تصير أحـــلام ولإني مش عارف فين الكلام بيروح سامحيني لو حسيت أكتر من المسموح جواب (5) اوعي تقوليلي ف فراقنا شوف افترقنا ازاي ده الناي بيبكي صبا من يوم ما ساب الجدر مقدرش يفهم ليه مشي وسابه الخضر سابه وعلمنا انه احنا مكتوب لنا نتمني ف الضلمة واحنا اللي مقسوم لنا نتـــــــــــلم م اللـــّمة ففهمنا مفهــــــمناش مسيرنا هــــــنفارق فليه هنبكي الفراق من حتي قبل اللقا 7 مايو 2004 – 6 ونص الصبح فوق السطوح « return.