by gsas egypt
Published on: Apr 21, 2008
Topic:
Type: Poetry
https://www.tigweb.org/express/panorama/article.html?ContentID=19975
اتنين صراصير قاعدين على قهوة في البلاعة قاعدين سوا بيتناقشوا حوالين قضايا الساعة قالوا المجاري السودة حصلت فيها مجاعة آخر خبر: الفيران اخترعوا ضد السموم مناعة ***** وف صفحة الحوداث بجورنال الماسورة سم الفيران يا اخواننا في غاية الخطورة بيسطل الصرصار ويغيّر في عقله الصورة يفتكر إنه إنسان ويتوه عن البلاعة ***** أما أخبار الرياضة في جورنال المجاري فاز صرصارنا البطل على الصرصار البلغاري في سباق العوم بلقب إنت صرصاري عشان كل الصراصير تبص تشوف الشجاعة ***** أما أخبار الفن .. أفلام ومسلسلات مسلسل جديد بيحذر من غدر الستات صرصارة قتلت جوزها بأفظع المبيدات الستات بقوا ألعن م البشر يا جماعة ***** الاتنين بصوا لبعض وقالوا يعني مافيش جواز مش عشان الموت لكن الجواز إعجاز مين هيجيب لعروسته سرير يكون هزّاز أو يسكّنها مطبخ ويسيب هوا البلاعة ***** قاموا من ع القهوة يتمشوا وسط القرف الأول قال للتاني الشباب خلاص إنحرف وأنا كنت هضيع يا عم إنما ربك لطف فقت ف آخر لحظة ورجعت للبلاعة ***** التاني بص للأول وقال له باين عليك تعبان رد الأول بسرعة بالعكس إنت اللي عيّان قاعد ترغي وترغي من الصبح كما الإنسان ميكروب البشر ده معدي وخطر عالبلاعة ***** الجوز وقعوا ف بعض واتجمعوا الصراصير الكل جه يتفرج .. آلاف من الطوابير وصلت قوام الشرطة والمنظر شكله خطير اعتقلوا الاتنين والتهمة ... إرهاب البلاعة ***تمت*** « return.