من جوه البلاطى البيضا
خرجت تبص روس
حوالين الرقابى معلقة
خراطيم ع الصدور تدوس
بايدين باردة و ميتة
فى جنب العيان تنغرس
و ترمى شوية فلوس
* * *
ياخوانا أنا كنت راجل محترم
يضربونى مثال السخاء و الكرم
غيرشى تعبى خلانى ع الحميد
و اللى تييجى عليه الأيام يتفرم
* * *
انا عمرى ما عملت ذنب كبير
يبلينى فى كبدى بسم خطير
المصيبة كانت جاية من عندكو
و العلة كانت فى حقنة الطرطير
* * *
عايز تعاين كبدى وتفعّص
بايد ساقعة خلت قلبى يتقلص
يعنى انتو تدمرونى زمان و دلوقتى
يبقى الدفعة الجاية عليه ح تخلص
* * *
حاسب يا بنى مكان الألم
نفسى أصرخ و الصرخة بتنكتم
مضطر اسيبك تقطع فى لحمى
لحم بنى آدم انت فاكره عدم!
* * *
نفسى أشتمكم لكن ايه العمل ؟
مصاريف العلاج ضخمة لا تحتمل
بيعتنى الأرض و البيت و العيال
و ديونى الكتيرة تهد الجبل!
* * *
يا سلام لو الميرى تخلص منّكو
أو الأنسانية تلاقى سكة لقلبكو
كنت أنام على سريرى من غير قلق
و ما كنتش أدعى فى سرى" الله يهدكو"!